Ila-ila Tag Balik

Kun ang mga segundo

nga ning agi natong duha

kan-on na sa orasan

Pwede ba kaha

nga mag ila-ila ta pag balik

isip estrangero sa usag-usa?

Magpabilin ta nga di magkaila

aron di nato kinahanglang tubagon

ang mga pangutana nga kinsa

Kay sama sa pagkuha nato

ug katungdanan sa atong kaugalinon

nga mangutana

Wa sad baya'y obligasyon

ang kalibotan nga tubagon

ang mga butang nga di masabtan sa katarungan

Tagay

I-banyos ang imong ngabil

Sa baba sa bugnaw nga botelya

Bati-a ang pagdagayday sa serbesa

Sa imong tutonlan

Ako'y ihap sa imong mga ladok

Usa...

Duha...

Namnama pag ayo ang lasa 

Timan-i baya ug tarong

Ang kapait nga nagpabilin

Apan ayaw tugti kini mubalhin

Sa imong kasingkasing

Atong abibahan

Ang kamingaw sa kagabhion

Imnon ang mga segundo

Nga wa huwata sa pagsilaw sa adlaw 

Tagayon ta ang mga butang

Nga di masabtan sa katarungan

Tagayon ta ang mga butang

Nga di na mausab sa kalibutan 

Ig human ining tagay

Dungan tag baktas pauli

Bisan tuod di tul-id ang dalan nga atong agian

Maabot ra lagi tas atong padulgan 

Balak

(Para sa imoha)

Tagsa-tagsa
Nakong papason ang mga linya
Sa balak nga wa nako tiwasa
Ug suwat para sa imoha

Tagsa-tagsa
Subayon pagbalik ang hulma,
Ug ang korba
Sa matag letra

Anam-anamon ug papha
Ang mga lakra
Sa nagkampat nga tinta
Hangtud mahanaw ang timailhan nga ning agi ka

Daob (Bonfire)

Nagamit nang ighahaling
Nahurot na ang mga nipa
ug mga lipak nga gitigom
nato gahapon sa hapon

Gikapoyan na ug tayhop
ang bugnaw nga huyuhoy
Nalaya na ang kalayo
Nahimong na kining aso

Nag ginokdanay ang abog
sa hangin sa kagabhion
Bitbit atong mga agik-ik
nga ugma di na mabalik

Kung mamatay ba ang sugnod
mahanaw pud ba sa hangin
ang lagitik sa mga sanga
nga atoang gihaling?

Mamahimo pa ba kaha
natong kining duslitan pa?
O biyaan nalang nato
sa wanang kining mga abo?

Bakunawa

"The Bakunawa is a dragon in Philippine mythology that is often represented as a gigantic sea serpent. It is believed to be the cause of eclipses" Encyclo.co.uk

paspas buwan 
apasa ang ako'ng mga dagan

subaya ug tarong
ang matag guhit sa orasan 
nga kapila ka libong nang gi-agian
sa ako'ng nagkahanap nga handurawan

paspas buwan
apasa ang ako'ng mga dagan

tagsa-tagsa ug dakop
ang  mga agik-ik
nga sa hangin 
na lamang nagpabilin

ipha ug tarong 
ang pisik sa taligsik
nga di na mauli
sa ngiaw nga langit

punit-a 
ang salin sa hapon
sala-a unya ayaga
uban sa mga bituon

paspas buwan
apasa ang akong mga dagan

ayaw baya ug biya
kun di ku nimu maabtan

Pangutana ang Buwan

suwayi palihug
ug tayhop
ang akong mga pilok
basin
naa pa'y salin ngadtu
sa imo'ng mga halok

hunghung-i pagbalik
ang ako'ng mga dunggan
pangutana
kung madungog pa ba nila
sa hangin ang imo'ng
mga hunghung

bati-a pag-usab
ang kahumok
sa ako'ng mga ngabil
susiha
kung malitok pa ba nila
ang imo'ng ngalan

naa pa ba kaha
sa mga grano sa ako'ng buhok
ang agi
sa imo'ng mga tudlo

nagpabilin pa ba kaha
sa ako'ng aping
ang kainit
sa imo'ng mga palad

nagpuyo pa ba kaha
ang ato'ng panahon
sa mga lugar
nga wa pa maagi-i sa oras

kaninumdum pa ba kaha
ang buwan
sa ato'ng kasikas
sa ato'ng huni 

dong
palihug ku ug susi
kay kung kining tanan wa na
dia ku'y i-puli