Pangutana ang Buwan

suwayi palihug
ug tayhop
ang akong mga pilok
basin
naa pa'y salin ngadtu
sa imo'ng mga halok

hunghung-i pagbalik
ang ako'ng mga dunggan
pangutana
kung madungog pa ba nila
sa hangin ang imo'ng
mga hunghung

bati-a pag-usab
ang kahumok
sa ako'ng mga ngabil
susiha
kung malitok pa ba nila
ang imo'ng ngalan

naa pa ba kaha
sa mga grano sa ako'ng buhok
ang agi
sa imo'ng mga tudlo

nagpabilin pa ba kaha
sa ako'ng aping
ang kainit
sa imo'ng mga palad

nagpuyo pa ba kaha
ang ato'ng panahon
sa mga lugar
nga wa pa maagi-i sa oras

kaninumdum pa ba kaha
ang buwan
sa ato'ng kasikas
sa ato'ng huni 

dong
palihug ku ug susi
kay kung kining tanan wa na
dia ku'y i-puli

Kapin Usa Ka Tuig

Panagsa, 
magmahay ku
nganu'ng 
wa tika lingi-a
adtu'ng gabhiuna 
human
sa atung 
ulahing
panag-istorya

Kun ning sigpat
kaha ku 
nimu 
sa katapusan 
higayon 
mausab ba kaha ang
akung mga paghandom? 

Apan humana
Nauli naku 
Nauli naka 
Di na ta pwede
mubalik pa 
atung higayuna 

Mao nga
pasenya, 
pasenya na kun 
wa tika 
lingi-a

Para sa Usa ka Torpe

Para ka Usa ka Torpe

(Kining balak tubag sa "Kumpisal sa Usa ka Torpe")

Oo. Kahinumdum kaayu ku, atung gabhi-unan'g

ning tubag lang ka'g "mao ba.."

human ku gisalig sa imuha ang sugilanon ku sa gugma

Kaninumdum pud ku atung nanglakaw ta's iskina

Gikan sa birthday party sa atung amiga

Tigmi ang hangin atu, ug nabati ku ang katugnaw

Maung gidalit mu ang imu pangsapaw nga wa ku dawata

Paglantaw ku diha nimu,

nakita ku ang kabugnaw

sa hangin sa imung mga mata.

Apan kibaw ka

Naa ku'y sikritu atung gabhi-una

Sikritu'ng di ku pa masulti sa imuha

Nagpasalamat ku nga naa ka uban naku atu

Anaa ka kalma gihapun bisa'g kibaw kung gikulbaan ka

Anaa ka sige'g pangutana bahin sa dag-un,

bahin sa atung gikaun nga panihapun...

Anaa ka nakig-dungan naku ug lakaw bisan unsa kagagmay ang akung mga lakang

Anaa ka's akung kiliran bisan wa ka nakig-istorya

Anaa ka bisan sa kahilum natung duha..

Sa tinuod lang,

Lisud paghatag sa tibu-uk kung pagsalig sa imuha

Di gali nimu malituk ug tarung ang akung pangalan

Unsa pa kaha ang imung mga kabalaka,

kabalaka bahin natung duha

Oo. Kibaw ku's imung mga kabalaka

Kibaw ku's mga butang nga di pa nimu masulti sa aku-a

Apan lagi kay kinahanglan magpaka-Maria Clara

Maghuwat ra kung mu sugid ka's imung mga katarungan

Nganu'ng maka-agwanta ka's aku'ng pagka-istrikta

Nganu'ng kasabut ra ka's aku'ng pagka-wala'y klaru panagsa

Nganu'ng masakpan tika nga mupahiyum

samtang namati sa akung mga pagpamalandung

Ug nganu'ng sa tanang panahun nga kinahanglan ku ug higala

permi'ng anaa ra ka..

Puhon

Kung makuha mu na ang ka-isug

nga ihubad naku kining mga rasun..

Gusto ku nga mahibaw-an mu

nga andam na ang tubag ku..

Kining akung balak nga para nimu

ug ang mga balak nga ihalad ku para nimu

ang tubag ku sa mga gi-kumpisal mu..

Pa load-i ku, hon

Pa load-i ku hon 
(usa ka halad para sa SAF44)

ni Maria Theresa Lanit 

Pa load-i ku, hon

Di na unya ku ka-reply nimu

Lisud baya ang signal ngadtu

Pangita-un kaayu

Inig minyu natu puhon

Di ko gusto mupuyo nganhi

Kay buntag pa gani 
Saba na

Ang mga batang nga wa pa'y kaun
Na'g shagit na
Di tungod sa gutom

***

Pa load-i ku, hon

Kay hapit na mi mubiya

Matud pa ni coronel,

Hangtud hapun mi ngadtu 

Text lang unya ku
Kung maka-uli nami sa campo

***

Wa lagi ku nimu naload-an, hon?

Last text na ni naku nimu 

Murag 
Di na madayun 
Ang aku pag-uli sunud buwan sa inyu
Madungog ku na ang mga ngisi
Sa mga tag-iya 
Aning bukida

Gituok naku sa baho sa pulbura

Nga gipa-butu nila kaganina

Padung na sila..

Wa naku'y mahimo 

Kay aku nalang
Nagpabilin diri
Nga naa'y bala

Akung mga kauban
Ning tihaya na...

Ning Liwat ni Mama

Ning Liwat ni Mama 

ni Maria Theresa Lanit 

Naliwat kas imong mama day

Nakuha mu ang iyang pagka-edukada

ug ang iyang pagka-Maria Clara

Nakuha mu ang iyang pagka-gwapa,

iyang panit nga murag porcelana

Parehas mu'g aping nagpuwa-puwa

Parehas mu'g ilong, taas, murag Amerkana

Naa pud nimu ang iyang pahiyom

nga nagpadayun
lang gihapun
bisan ang mga kasakit giluom

Nakuha mu niya
ang maayu'ng kinaiya,

kung unsaon 
pag am-am sa kaugalingun
kun mangisog na si papa ig maka-inom

Pero ang pinakanaliwat nimu niya

kay ang siplat sa iyang nga mga mata

nga sa una punu ug pagsalig ug paghigugma

Mga mata'ng punu ug panganod,

galutaw sa nang lata nga mga tabon-tabon
Mga mata nga
ang kalipay nalang karun
kay ang kahilom sa kagabhi-un

Naliwat kas imung mama day,

perting liwata

photo taken from web

Matud Mu Pa

photo taken from web

Matud Mu Pa

(kang Jimmy)

ni Maria Theresa Lanit

"wa'y hilakay ha?" matud mu pa

"smile pud panagsa mentras naglakaw ta..."

"gwapu baya kaayu ka sa imung barong" matud mu pa

"tanaw gali kaayu nimu ang mga bisita..."

"ikaw ang pinaka-gwapung laki akung nakita" matud mu pa

"maayu kaayun'g pagkaliwata"

"ayaw'g guol-guol diha" matud mu pa

"love man gihapun tika.."

"bisan ug aku na ang iyang rayna.."

"aku gihapun ang imung princesa"

Hubo-i Ku Dong

Huboi Ko Dong

ni Maria Theresa Lanit 

Huboi ko dong 

ug kanimo

ihalad ko ang tibuok kong pagkatawo 

Husloa kining huot kung sanina 

nga nagpugong sa akong kalipay

Unya tangtanga 

dayun ang nagtaptap sa akong dughan

aron makita mo 

ang kung unsa man 

ang nagpitik sa akong kasingkasing

Walisa ang taas kung buhok 

nga nagtabun sa kasakit sa akong mga mata

ug tutoki dayon ko

Samtang gisuhid mo ang akong lawas

hapoa ang mga uwat

hubada kung unsa ang iyang samad 

kung masabtan mu na ang gigikanan sa samad 

Guniti ang akong mga kamot 

ug hinayhinay kita mubiyahe 

ngadtu diin di nako manghangyo

kanimo nga ako hubo-an

Photo credits: Pete Zaesar Galula