Para ka Usa ka Torpe
(Kining balak tubag sa "Kumpisal sa Usa ka Torpe")
Oo. Kahinumdum kaayu ku, atung gabhi-unan'g
ning tubag lang ka'g "mao ba.."
human ku gisalig sa imuha ang sugilanon ku sa gugma
Kaninumdum pud ku atung nanglakaw ta's iskina
Gikan sa birthday party sa atung amiga
Tigmi ang hangin atu, ug nabati ku ang katugnaw
Maung gidalit mu ang imu pangsapaw nga wa ku dawata
Paglantaw ku diha nimu,
nakita ku ang kabugnaw
sa hangin sa imung mga mata.
Apan kibaw ka
Naa ku'y sikritu atung gabhi-una
Sikritu'ng di ku pa masulti sa imuha
Nagpasalamat ku nga naa ka uban naku atu
Anaa ka kalma gihapun bisa'g kibaw kung gikulbaan ka
Anaa ka sige'g pangutana bahin sa dag-un,
bahin sa atung gikaun nga panihapun...
Anaa ka nakig-dungan naku ug lakaw bisan unsa kagagmay ang akung mga lakang
Anaa ka's akung kiliran bisan wa ka nakig-istorya
Anaa ka bisan sa kahilum natung duha..
Sa tinuod lang,
Lisud paghatag sa tibu-uk kung pagsalig sa imuha
Di gali nimu malituk ug tarung ang akung pangalan
Unsa pa kaha ang imung mga kabalaka,
kabalaka bahin natung duha
Oo. Kibaw ku's imung mga kabalaka
Kibaw ku's mga butang nga di pa nimu masulti sa aku-a
Apan lagi kay kinahanglan magpaka-Maria Clara
Maghuwat ra kung mu sugid ka's imung mga katarungan
Nganu'ng maka-agwanta ka's aku'ng pagka-istrikta
Nganu'ng kasabut ra ka's aku'ng pagka-wala'y klaru panagsa
Nganu'ng masakpan tika nga mupahiyum
samtang namati sa akung mga pagpamalandung
Ug nganu'ng sa tanang panahun nga kinahanglan ku ug higala
permi'ng anaa ra ka..
Puhon
Kung makuha mu na ang ka-isug
nga ihubad naku kining mga rasun..
Gusto ku nga mahibaw-an mu
nga andam na ang tubag ku..
Kining akung balak nga para nimu
ug ang mga balak nga ihalad ku para nimu
ang tubag ku sa mga gi-kumpisal mu..
